Videosurveglianza
Infurmaziuns davart la videosurveglianza
Intginas localitads da l’Institut d'assicuranza sociala dal chantun Grischun IAS ch’èn accessiblas al public, p.ex. la recepziun, vegnan videosurvegliadas. Sequentamain infurmain nus Vus co e pertge che nus elavurain en la videosurveglianza datas da video (datas persunalas) che reguardan Vus.
Responsabladad
L’IAS Grischun è responsabel per la videosurveglianza e l’elavuraziun da las datas persunalas.
Intent da la videosurveglianza
L’IAS Grischun elavura las datas persunalas en il rom da la videosurveglianza a moda responsabla ed observond las disposiziuns legalas. Cun la videosurveglianza vul el proteger persunas e rauba dad acts illegals, persequitar acts illegals, prevegnir ad acts illegals e far valair pretensiuns legalas.
Signaletica
L’IAS Grischun renviescha a la videosurveglianza cun tavlettas respectivas a l’entrada.
Moda da la videosurveglianza
La videosurveglianza serva a la surveglianza passiva (far registraziuns da video e, sche necessari, evaluar ellas pli tard) e succeda senza registraziun dal tun. L’examinaziun posteriura da las registraziuns vegn fatga en l’IAS Grischun exclusivamain da persunas autorisadas e tenor il princip da la necessitad (guardar mo en cas da basegn). Il dumber da persunas che han access a las registraziuns vegn minimà il pli fitg pussaivel.
Durada da l’archivaziun
L’IAS Grischun memorisescha las registraziuns da video durant 72 uras. Suenter che quel termin è scadì vegnan las datas stizzadas, nun ch’i vegnia scuvert entaifer quella durada in eveniment relevant per ils intents menziunads da la videosurveglianza. Sch’i vegn scuvert in eveniment relevant per ils intents menziunads da la videosurveglianza, ston las registraziuns vegnir stizzadas uschespert ch’ellas na vegnan betg pli duvradas per intents da scleriment e da cumprova.
Segirezza da las datas
L’IAS Grischun protegia las registraziuns da video cunter perdita, manipulaziun, enguladitsch ed access nunautorisà. El tegna en salv las registraziuns ch’èn protegidas cun in pled-clav.
Surdada da las registraziuns da video
L’IAS Grischun dat vinavant las registraziuns da video ad autoritads da persecuziun penala, dretgiras e cuntrapartidas, sche quai vegn ordinà da las autoritads da persecuziun penala u da dretgiras, u sche quai è necessari per far valair ils dretgs da l’IAS Grischun.
Voss dretgs
Vus avais ils suandants dretgs en connex cun las datas persunalas che reguardan Vus:
Il dretg d’obtegnair infurmaziuns davart las datas persunalas che nus memorisain en connex cun Vus e co che nus elavurain ellas. Il dretg da retschaiver u transferir ina copia da Vossas datas persunalas en in format current. Il dretg da rectifitgar Vossas datas persunalas. Il dretg da laschar stizzar Vossas datas persunalas. Il dretg da s’opponer a l’elavuraziun da Vossas datas persunalas.
Observai p.pl. che valan per quests dretgs cundiziuns legalas ed excepziuns. Sche quai è giuridicamain admissibel, pudain nus refusar Vossa dumonda d’exercitar quests dretgs.
Ulteriuras infurmaziuns
Nus respundain gugent a Vossas dumondas davart la videosurveglianza. Ans contactai per plaschair via datenschutz@sva.gr.ch ubain telefonicamain sut 081 257 41 06.
Versiun 09/2023